Il primo Maggio festa del lavoro
festeggiato da tutti i lavoratori
e dal popolo di Carate Brianza.

1. Su invìt del Comitaa de liberaziùm de Caraa
   anca nel noster paès el prìm de Mag l'è stà festeggiaa
   con grand differenza però di àlter an
   anzi cònt un scopo sacrosanto e different in quest'an.
2. Quest'an se dovèva festeggià la data de resurreziùm
   la disfatta del fascismo che l'ha ruvinaa la nostra Naziùm.
   circostanza speciàl per tut nùgn Caratès
   e ciòè ricordà i tri Martir fusilaà del noster paes.
3. A la mattina con foièt volànt e manifèst murài
   Se invidàva la popolaziùm a senti la parola del Comitaa
   oratùr dovèven vès Gilardelli, Valtorta e Maggiùr Màj
   che del Comitaa Centrà èren staa autorizzaa.
4. Diffatti vers i desur con la banda a la tèsta
   se rìva in piazza cont un codàzz de gènt tutt in festa
   la piazza gremìda de gènt che aspettaven con passiùm
   la parola e el moment de inaugurà la resurreziùm.
5. A un certo punto se sènt la gènt che tùt batten i màn
   e diffatti el riva una bella squadra de eròi partigiàn
   che lùr per i prìm sin sentii in dovèr
   de armàs come tut i àlter per scaccià el stranier.
6. Al prim piàn del Caffè De Angeli e precisament al balcùm
   dove dovèven parla i oratùr del Comitaa de liberazium
   ei prim a parlà l'è staa el Cavalier Carlo Valtorta
   che del Comitaa Centràl el sò salùt el porta.
7. In sèguit l'invidava el popol a vès tut compàt e unì
   a stringes insèm tut i idèi e i partii
   che soltànt a fà inscì anzi appunto perchè inscì l'è staa faa
   èm stroncaa el fascismo e gh'em avù la libertaa.
8. Ogni tant interròt da applaùs e battimàn de la gent
   che se trovava in piazza (circa des mila presènt)
   l'ha terminaa raccomandànd che a fà inscì no se sbaglia
   saraà cambiaa el sistèma de vinticinquàn passaa in Italia.
9. Dopo el ga daa la parola a Gilardelli Comunista
   che per vint'àn pussee I'è staa proibi de mèttes in vista
   ma che inchèu per mezzo de sta general insurreziùm
   anca lù l'ha svòlt el programma del Comitaa de liberaziùm.
10. El Maggiùr Gian Maria Maj che l'era presènt anca lù al balcùm
    el mèt al corrènt i compàgn d'una piccola indisposiziùm
    el prega allora el Cavaliar Valtorta de parlà a nòm sò
    e diffatti el Valtorta el torna a parlà ancamò.
11. Parland al popol de la situaziùm del Comùn
    l'a trovaa che de pàn ghe ne pù per nissùn
    in tùt a l'ammàs l'ha trovaa dù quintài de formènt
    e còme se farà a dàch de mangià a tutta gent?
12. In ògni modo però l'ha raccomandaa de vèch paziènza
    ch'el cercarà de contentàm tuc e nissùgn resterà senza
    e allora l'ha pregaa tut i present e specialment i agricultùr
    de portà amò del grán e aiutà un pù anca lùr.
13. Allora tut la gènt meravigliaa se guardàven in fàccia
    a commentà tùt quel che gàn daa a l'ammàs e per l'audacia
    ch'in staa obbligaa di fascisti a portà el gran per polènta
    e po lùr l'an rubaa tùt e al popol gan faa tirà la zenta.
14. In ultim el Valtorta che le un òm de bùm critèri
    l'ha ordinaa ch'el corteo l'andàs a trovà i mort al Cimiteri
    allora la gent lapplaudì amò e con la banda a la testa
    i'ha seguì el cortèo tut contènt e tùt in festa.
15. Appena rivaa al Cimiteri e che tut se mì a pòst
    l'ha tegnù un piccol discùrs anch'el sciùr Prevòst
    invitànd tut el popoi a la càlma e a la preghièra
    che allòra se salvarèm da qualùnque bafera.
16. In ùltim el tàcca a pieùv e sot a l'acqua el corteu l'ha continuaa
    traversànd sèmper con banda in tèsta tùt i stràd de Caraa
    e tutt con contentezza perchè l'è rivaa sto bel dì
    e quand s'e sciòlt el cortèu el sonava già mezdì.
17. La banda che l'èra accompagnàa del so Direttùr
    ch'el ga dit de trovàs amò vers i do ùr
    perchè dopo se dovèva andà inscì pian pian
    a Onorà el prìm de Mag anca su a Veran.